ពៅ លីដា បដិសេធចំណងស្នេហ៍ ជាមួយប្រុសស្អាត អ៊ុន សិទ្ធា

ភ្នំពេញ៖ ថ្មីៗនេះ មហាជនជាច្រើន មានការចាប់អារម្មណ៍ ពិសេសទៅលើទំនាក់ទំនង រវាង តារាប្រុសស្រីពីរដួង គឺតារាសម្តែង កញ្ញា ពៅ លីដា និងតារាសម្តែងបុរសសង្ហា លោក អ៊ុន សុធា ហាក់មានភាពជិតស្និទ្ធិល្អូកល្អើន ជាមួយគ្នាប្រៀបដូចជាគូស្នេហ៍ថ្មោងថ្មីនោះ។ តារាសម្តែងម្ចាស់សាម៉ីខ្លួននាង ពៅ លីដា បានប្រញាប់ប្រញាល ចេញមុខច្រាន ចោលព័ត៌មានស្នេហានោះ ភ្លាមៗថា នាងនិងតារាសម្តែង លោក អ៊ុន សិទ្ធា រាប់អានគ្នាត្រឹមតែមិត្តរួមអាជីព គ្មានអ្វីលើសនេះឡើយ ។

ជួបសម្ភាសន៍ តាមទូរស័ព្ទ ជាមួយគេហទំព័រ LookingTODAY នៅថ្ងៃទី៥ ខែសីហា ឆ្នាំ២០១៥នេះ តារាស្រីចម្រុះស្រួច កញ្ញា ពៅ លីដា បានប្រាប់ឲ្យដឹងថា ព័ត៌មានដែលលេចឮចចាមអារ៉ាមថា នាងមានស្នេហា ជាមួយ លោក អ៊ុន សិទ្ធា គឺមិនមែនជាការពិតទេ ។ព័ត៌មាននេះចាប់ផ្តើម លេចជារូបរាង គឺបន្ទាប់ពួកគេចាប់ដៃគូគ្នា សម្តែងរឿង កាលពីពេលថ្មីៗនេះ តែប៉ុណ្ណោះ។

តារាស្រីសម្បុរ ស្រអែមស្រស់រូបនេះ បានប្រាប់ឲ្យដឹងថា « រឿងនេះ ជាការយល់ច្រឡំទេ ទំនាក់ទំនង រវាងពួកខ្ញុំទាំងពីរនាក់ គឺគ្មានអីលើសពីមិត្ត រួមការងារទេ ហើយម្យ៉ាងទៀត អ្នកសិល្បៈ បើបានរួមការងារ ជាមួយគ្នាហើយ គឺតែងតែមានភាព ជិតដិត រាប់អានគ្នា វាជារឿងធម្មតា គ្មានអ្វីចំឡែកទេ ។ ខ្ញុំសុំបញ្ជាក់ថា ខ្ញុំហើយនិងគាត់ (អ៊ុន សិទ្ធា) មិនមានស្នេហាក្រៅឆាក ជាមួយគ្នាទេ ដូចទស្សនិកជន យល់ច្រឡំទេ ខ្ញុំសង្ឃឹមថា ក្រោយពីបកស្រាយ ហើយទស្សនិកជន នឹងលែងយល់ច្រឡំ មកលើទំនាក់ទំនង ពួកខ្ញុំទៀតហើយ..»។

នៅក្នុងនោះ តារាស្រីដែលវិវត្តន៍ខ្លួន ក្លាយជាម្ចាស់ហាងកែសម្ផស្ស ទាំងវ័យក្មេង កញ្ញា ពៅ លីដា បានប្រាប់ឲ្យដឹងទៀតថា នៅពេលនេះម៉ោងនេះ នាងមិនទាន់មានម្ចាស់បេះដូង មកជំពាក់ចិត្តទេ ដោយនាងចង់ទុកពេលពង្រឹងមុខជំនួញ ពង្រឹងការងារសិល្បៈ ឲ្យជោគជ័យខ្លាំងជាងនេះសិន ប្រហែលជា២-៣ ឆ្នាំទៀត បានចាប់ផ្តើមគិតពីរឿងស្នេហា សាងគ្រួសារ ដូចនារីដទៃ ៕